Teksten - Het dialect: WESTVLAAMSE NIEUWJAARSGROETEN

't Is were zoverre
de deure van 2019 stoat ip a gerre
een hèèl nieuw joar
voor te leven met malkoar
liefde in 't ménage tussen de vint en de vrouwe
en is ter ol è keer miserie of boel
smiet olleszins met gèn meubels moar zet j'ip ne stoel
en laat het moar overwaaien da rottig gevoel
want oe da je 't ook kèèrt of oe da je 't ook droait,
't is dedju stille woar dat 't nooit een kèr woait.
Zie je momenteel nog nie van de straote
gèn paniek, t' is ip da vlak noois nie te loate
want wa zeggen ol die tupperware demonstranten
oen ze geconfronteerd worden met under klanten
'een dikke, een kromme, een schele of een dulle
ip ieder potje past er een ulle'.
Moar 'k wille ook nog teen en 't ander wenschen :
'k wensche julder wat da 'k zelve betrachte,
bij dage een bitje werk, en ruste bie nachte.
Als g' honger hebt, een bètje brood;
als g'durst é, geen watersnood;
geen schulden tenzij deze dat ge efnan kunt
betalen met gepaste munt.
En heel 't joar, lik of dat goat en stoat,
geen pijne noch smerte
aan je tanden of an 't herte.
Kortom, 'k wensche joen 't beste voar noaste jare
En 'k goa daarbie laten voor vandjare